隨筆

以前讀書講起《桃花源記》，大家都先入為主咁話係描述陶淵明對理想社會嘅想象 etc etc，但我睇返啲文字，老實講點睇都係 100% 紀實。 道家風格借用人物典故都唔少，例如莊子寫孔仲尼嘅事跡就寫到繪影繪聲（而且應該係9up...）。但《桃花源記》嘅時間、人物、地點都交帶得好清楚，更重要係入件事喺陶淵明本人在世時發生嘅。晉朝士人圈子本身唔係好大，唔通咩「南陽劉子驥高尚士也，聞之欣然規往」都係9up？無端端拖啲同時代嘅名士落水亂作故仔就係為咗描寫個所謂理想國？ 如果本身你9up開，可能覺得冇咩所謂，但士人之間點都唔至於咁亂嚟。老作唔係唔得，不過標準手法係托古，而唔係隨便指住個可能撞口撞面見到嘅人就作個故仔出嚟。 我查查下資料先發現佢呢段故後面附帶首詩，同《歸去來辭》一樣，係有一段序、一首詩咁嘅格式。呢首《桃花源詩》就寫意得多，帶比較多嘅個人情感同想像成份。所以照計《桃花源記》就係當時流傳嘅一段奇事，陶老借題發揮寫咗首詩講理想社會，但件事本身係基於真實流傳緊嘅故事。 陶淵明呢段文字本意係紀實嘅，而「南陽劉子驥高尚士也，聞之欣然規往」都代表當時士人圈子係有人覺得件事係真嘅。咁但係世界上係咪真係可能有呢種避世避得咁徹底嘅地方呢？ 只可以話 yes and no。物理上嘅可能性比較低，事實上官方搵咗次搵唔到，爬山友劉子驥搵唔到，都大概說明呢個地方物理上唔存在。咁單嘢係咩一回事呢？ 我既理解係，發現「桃花源」嗰條友其實係好巧合咁經「洞天」走咗入另一個「維度」，「桃花源」算係另一個維度嘅世界。 我仲未認真有系統咁研究中國啲趣奇傳說，所以「洞天」我都只係識啲皮毛。基本上「洞天」係傳說中啲山洞入面嘅「portal」，可以接駁其他嘅「維度空間」，《桃花源記》嘅故仔感覺上就係好典型唔小心遇上「洞天」嘅故事嚟。呢啲非唯物主義嘅東西通常都係一時時，睇緣份，所以你認真走去搵佢嗰陣就唔見得會搵到。係「真」定唔「真」就睇你個人詮釋，只可以講呢類偶爾遇上「洞天」嘅故仔古今中外不斷有所傳聞，「客觀」驗證唔到佢究竟係啲乜，但同時間啲故仔又算係有某些可考究嘅規律同共通點。 研究非唯物主義現像其中一個有趣(??)之處就係，你會發現身邊好多嘢都可以有另一個解讀，而好多時呢啲「另類」解讀更加make sense。否則你就要接受慣性將人哋正正經經嘅敍事紀錄硬屈咗係杜撰創作，唔係一篇半篇，而係你睇唔明嘅所有嘢都當係9up。（基本上現代標準作業流程就係咁，嘿嘿。）