隨筆

四十歲大限就（仲有N個月）到，諗起兩樣嘢。 其一係所謂「不惑之年」。孔子「四十而不惑」，我自問三十歲就已經有決疑嘅系統（照見本老師名句）。呢方面算係另過孔老師。 其二係我多年前某個觀察。「四十歲大限」係講緊，我留意到好多人（尤其係男人）到咗 40+ 嘅年紀之後，自信好似會急升，對住啲經驗比較少嘅人會擺出一副「你識啲乜吖，本老師食鹽多過你食米」嘅態度。呢種自信似乎同能力完全冇correlation，唔知係華人社會定係西方都係咁 （最近喺 threads 同幾位 rando 外國人 boomer 接觸之後認為未必關華人文化事） 其實老屎忽態度同「不惑」係有好微妙嘅關係。覺得自己一定啱都會得出「不惑」嘅效果。講咩做人要謙虛乜乜柒柒其實冇咩用，個核心問題唔係咩「態度」，而係你點對待自己活咗半(個)世(紀)嘅經驗：你信你辛辛苦苦得來嘅經驗，定係信個唔知乜水嘅𡃁仔講嘅嘢？如果你下下都質疑你嘅經驗同經歷，咁你人生就係不斷所有嘢由頭學過，實際上係行唔通嘅。至於點樣判斷邊啲經驗係「啱」定「錯」？ 嘿嘿，係冇方法㗎。（如果你覺得有嘅話，就更加證明我講嘅嘢冇錯。） 所以根本個問題係冇解嘅。不惑仍然係不惑，本老師仲要早過孔老師不惑⋯⋯ 所以終於面對呢個四十歲大限嗰陣，我都唔知會點。嘿嘿。 （對於呢個問題嘅解藥，我係有啲 hypothesis 嘅。不過都未試過，講出嚟咪 9up。嘿。）