隨筆

唔嗌交，講下啲比較 constructive 嘅嘢。 本身思想係有文化脈絡嘅。可能係受耶教影響，西方思想係骨子裡認為人類比其他物種優秀，人類係唯一以神嘅形相製做嘅物種，所以有權支配萬物。 "And God said, Let us make man in our image, after our likeness: and let them have dominion over the fish of the sea, and over the fowl of the air, and over the cattle, and over all the earth, and over every creeping thing that creepeth upon the earth." （Genesis 1:26) 呢樣嘢一直到近代，甚至去到 21 世紀，啲深受耶教影響嘅西人都仍然會假設例如動物冇意識 etc，可以話係耶教思想嘅一大特色。呢啲例子年中見唔少，直到最近我都仲喺 youtube 見到個 neurosurgeon 講佢點解認為人類有靈魂，唔知點解佢都要強調動物嗰種魂同人類唔同㗎，人類係好特別。印像中東方思想係少啲。(見留言) 喺咁嘅文化脈絡之下，一個西方文化出身嘅西方哲學家提出「喂唔係喎，動物同人喺好多方面都好相似㗎喎，係咪應該一視同仁呢」係一種對原本文化脈絡底下公認嘅假設嘅反思，係當你身處呢個特定文化環境嘅時候提倡出嚟先至會有實際嘅意義。 咁香港係一個比較特別啲嘅地方嚟，你若果堅持自己黃皮白心，由細到大淨係讀過《聖經》(見上) 冇聽過人講咩菩薩勸人唔好殺生之類嘅東方思想，咁又真係無可厚非嘅，但未免狹隘。 香港呢啲文化雜燴嘅地方，讀書嘅時候搞清楚思想嘅文化脈絡尤其重要。呢度嘅讀者可能記得我講「#人形蜈蚣」，人哋食完消化完嘅嘢，你不問來歷就隊個口埋去食，然後消化完又再餵俾人食，當中唔見咗啲咩，剩低啲咩，係好值得大家反思嘅問題嚟。 好多嘢偏偏就係喺歐美嘅環境提倡或實踐冇問題，一攞嚟香港做就出事，或者變得奇怪。但好多香港人就係覺得人哋啲嘢咩 universal truth 嚟，照抄都冇問題啦。 老老實實，從一個 fans 嘅角度，不斷分享推し嘅嘢係人之常情，真係唔應該批判嘅，事實上哲學系學生好容易變成「名哲學家粉絲團」。但從學習求精進嘅角度，撻朵其實真係一個壞習慣嚟，因為撻嚟撻去都係其他人嘅思想，就算你話咩「借人哋把口嚟表達自己嘅想法」都始終係會有啲偏差。《周易》云：「天行健，君子以自強不息；地勢坤，君子以厚德載物。」