隨筆

常言道「佛渡有緣人」。 本身喺佛嘅眼中眾生平等，本應一視同仁，點解會有呢種差別呢？ 歸根究底都係因為自由意志。自由意志係世界最犀利嘅嘢嚟，以致可以導出「無論咩都好，只要你真心相信，對你而言就係真相」嘅法則。 呢個世界冇絕對嘅真理，聽者覺得唔啱就係唔啱，冇得拗嘅，真理亦絕對唔係所謂「越辯越明」。之所謂「渡」，若果唔係本住慈悲之心希望其他人過得更好，妄想要去「渡」人就不免涉及小我嘅膨脹，無論 underlying 嘅訊息本意良善，傳銷手法有缺陷都會令件事變質。 所以真正有善心嘅傳訊方式，應該係要內置機制，防止傳到去啲唔想接觸到呢啲嘢嘅人身上。呢方面，古聖哲嘅傳承模式係真係好有參考價值。例如耶穌出名講寓言，將核心內容「加密」再套上個大眾化包裝方便傳播；禪宗講究以心傳心，個人化度身訂造嘅方式傳授心法；又或者最普遍嘅做法係將啲訊息照直紀錄，一般人「不明覺厲」，連同意與否都未必講得出。 搞到咁複雜都真係好煩，但為免作太多無謂嘅業，都唯有時刻提醒自己要小心啲。