隨筆

有啲幾緊要嘅諗法埋藏咗喺冇人睇嘅英文 substack ，寫返幾句中文先。 話說近年成日有人懶醒咁去估「究竟有啲咩 AI 做唔到」，打算教個仔去做嗰行逃過被 AI 取代嘅命運。 想知道「AI 有啲咩做唔到」首先要知道「AI 有啲咩做得到」。我係理論撚嚟，講一年半載會發生嘅嘢就唔多識 (要問下啲過億美金年薪嘅磚家⋯ 或者俾返幾億我我都可能會答你)，不過用嚟展望幾廿年後嘅事就易啲。AI 個基本理論好簡單，籠統講就係：只要你個系統夠快，而你又講得出你想要啲乜，咁叫佢自己搞掂就得。 (要抛書包就係：參考 The Bitter Lesson，手段係 gradient descent) 聖經都有講：「你哋求就必俾你，你搵就必遇著」 (馬太7:7) 本來問題問得就係有答案嘅。 所以只要你講得出你想要嘅嘢， AI 遲早都做得到。而實際上係早多過遲。而家啲 AI 似乎好難 train，問題就係我哋未識得定義咩係「智能」，唔識得有系統咁將海量嘅 AI 嘅輸出做評分。事實上我哋而家連 train 完出嚟嘅 AI 勁唔勁都冇一個好嘅方法去評估，除咗靠啲唔知有幾準嘅benchmark之外，基本上就係靠用戶嘅主觀感覺。 咁 AI 如果真係咁勁，人類何去何從？唔怕。喺資本主義崩潰、內捲意識形態消退之後，人類一係已經滅亡，一係就已經唔使點撈，絕大部份粗重嘢都由 AI 代勞。喺呢種半神狀態下，人嘅主要功能就係 *諗清楚自己想要啲乜* 。 AI 其中一樣唔可以取代人類嘅嘢，就係唔可以幫你決定你想要啲乜。而 *諗清楚自己想要啲乜* 其實就係創作。自由意志係宇宙基本原則之一，AI 點發展都唔會蓋過呢個基本原則。 (( 至於「資本主義崩潰」咁大件事係點發生，ehh 我唔係搞馬克思主義嘅，同埋我已經破例做咗次先知，呢啲無謂嘢唔好問我~