隨筆

前排肚腩大咗好L多，個胃又唔舒服 (有啲懷疑係物理上頂住排骨開始痛 -_-)，又係要辟穀嘅日子。 又唔係完全唔食嘢，中間仲有啲飯聚乜乜乜照去，但平日自己就食少咗好多嘢。我諗冇飯局嘅日子實際食量係一日一細餐左右，主要係治肚餓。 頭幾日有少少亂，都有兩次忍唔住走咗去大食特食，但而家呢刻好似進入咗ketosis嘅狀態，飢餓感唔係好特別，但我都會食下啲 keto 嘢充飢。 話說 HKTV Mall 偶然都會有啲比較平價嘅油封鴨，我買到嘅係 ~$200 嘅 >1kg 一罐嘅油封「鴨翼槌」，肉係少啲，但淨係啲鴨油都抵。 啲肉我就齋食，食咗兩三餐就開始 keto⋯ 我都係覺得我十幾年前第一次辟穀真係好犀利，真係成個幾兩個星期幾乎冇食固體食物，減咗應該~6-7kg⋯ 之後點都 replicate 唔返⋯ 都係會忍唔住食啲嘢咁。但今次我就勁在係一路辟一路可以出席飯聚照常食嘢。 暫時呢刻嘅感覺係，雖然明顯感受到身體係餓緊，但唔會四肢無力，主觀感覺身體「燒能源」係燒得好平穩，氣息平穩，個「肚」亦唔會點餓。起碼唔會覺得「我而家食個漢堡包就好喇！」，反而會覺得「雖然我餓餓哋，但我知道就算食個漢堡包都唔會覺得飽」。而「真係食到好飽」嗰種胰島素充血嘅感覺其實係麻麻哋好受，起碼而家唔特別想要。 話說嗅覺好似靈敏(恢復??)咗，之前聞嘢好似係虧虧哋。個鼻塞都係好咗啲 （不過呢個 expected 嘅）。 某程度上呢次 ketosis 嘅純度同我第一次辟穀嗰下有啲似，但可能第一次辟穀嗰下太過暴力，所以彈返轉頭就好難 pick up 返。今次感覺可能可以幾持久下。希望係咁。 PS: 至於減咗幾多，唔知，冇磅，唔太敢睇數字，驚嚇死自己。本身 trigger 我減嘅肚腩問題就改善咗嘅，所以數字就算數啦。