隨筆

今日唔使返 office，但屋企又熱又焗，我又唔想開冷氣 心諗都差唔多十一月，出面如果唔熱嘅話可以搵個地方坐下諗下工作啲嘢 一睇，dxu，28+度，咩料。但見到大帽山山頂竟然係十幾度。心諗豈有此理，忽然動念，坐言起行，咁就走咗去大帽山。 搭咗 51 號去川龍村。條村個地理位置係幾靚，但太多荒廢咗嘅雜物同違棄嘅車，少少煞風景。有啲舊車有「I will buy for $xxxx [<電話>]」嘅字樣，應該係有人回收舊車？ 但可能車主已經唔喺度。 順龍村原來有酒廠(三生酒廠)，估佢唔到。另外有個石廠，整墳墓、石獅子之類。附近一堆住宅，亦都唔知係咩類人居住。又唔多似高級住宅，但睇個勢啲原居民好多都唔係住喺度。 見附近有個「扶輪公園」諗住近近地行過去，去到條山徑(扶輪公園自然教育徑) 前面先發現有 ~130m elevation。本身冇行山嘅打算，不過既然都嚟咗，心諗 100m 應該ok 嘅，睇時間仲未天黑，就去馬。 由於自己身體老毛病嘅關係都行得幾辛苦，最怕啲咁斜嘅路。基本上全程樓梯石級。但個扶輪公園同附近個停車場係幾靚嘅。同埋太陽下山，啲風吹埋嚟，真係涼爽嘅，大帽山凍啲真係唔係呃人。 (咁我個位置其實都有 450m elevation 嘅) 好耐冇同啲樹呀山呀水呀交流 （咩啫，香港夏天行山真係搞唔掂），今日都算係久違嘅召喚。 最後同一隻狗、一隻牛喺個停車場度 chill 咗大半個鐘。其實生活真係可以咁平靜。 後來先發現原來 51 號喺平日係一個鐘一班車 (假日半小時一班⋯ 即係假日旅客先會搭？） PS: 好神奇地山上好似唔多蚊。去到黃昏啲燈下面都係冇蟲嘅，唔知係點做到。